ມັນບໍ່ແມ່ນເລື່ອງຫນ້າຍິນດີ ຖ້າເຮົາຮູ້ ຫຼື ເຫັນສະມາຊິກໃນບ້ານຄົນໜຶ່ງລົ້ມປ່ວຍ ແຕ່ເຮົາກັບກິນຢູ່ສະບາຍ ເຮົາມີຫຼາຍເຫຼືອລົ້ນ ອີກຄົນຂາດແຄນຈົນອະນາຖາ…ຂ້າພະເຈົ້າເກີດຮູ້ສຶກດີໃຈທີ່ໄດ້ເປັນສ່ວນໜຶ່ງຊ່ວຍເຫຼືອຜູ້ຕິດເຊື້ອທຸກຍາກ ແລະ ພໍໃຈທີ່ຕົວເອງໄດ້ຮຽນຮູ້ ແລະ ພັດທະນາໄປນຳ.
ຂ້າພະເຈົ້າຊື່ ນາງ ສຸດາວັນ ພົມມະຈັນ ອາຍຸ 24 ປີ ສຳເລັດການສຶກສາ ຈາກຄະນະວິທະຍາສາດສັງຄົມ ສາຂາສັງຄົມສົງເຄາະ ແລະ ການພັດທະນາ ມະຫາວິທະຍາໄລແຫ່ງຊາດ.ປັດຈຸບັນໄດ້ຮັບໂອກາດ ເຮັດວຽກເປັນຜູ້ປະສານງານໂຄງການ ແລະ ອາສາສະໝັກ ຂອງສະມາຄົມເຄືອຂ່າຍຜູ້ຕິດເຊື້ອເຮສໄອວີ/ເອດ(APL+) ໃນ ສປປ.ລາວ. ຮູ້ສຶກດີໃຈຫຼາຍທີ່ໄດ້ເຮັດວຽກກ່ຽວກັບການພັດທະນາສັງຄົມ. ສ່ວນຕົວແລ້ວ ຮູ້ສຶກວ່າມັນມີຄວາມໝາຍ ຄືເຮົາໄດ້ພັດທະນາຕົນເອງ ແລະ ໄດ້ຊ່ວຍພັດທະນາຄົນອື່ນໄປນຳ.
ເປັນເວລາກວ່າ 2 ປີແລ້ວ ທີ່ຂ້າພະເຈົ້າພ້ອມທີມງານທີ່ມຸ້ງໝັ້ນ ແລະ ເສຍສະຫລະ ພວກເຮົາເຮັດວຽກຈັດການຊ່ວຍເຫຼືອດູແລຜູ້ຕິດເຊື້ອເຮສໄອວີ ແລະ ຜູ້ໄດ້ຮັບຜົນກະທົບທີ່ທຸກຍາກ ໃນຂອບເຂດທົ່ວປະເທດ ຮ່ວມກັບໜ່ວຍງານຈ່າຍຢາ ແລະ ປິ່ນປົວເຮສໄອວີ/ເອດທັງ 11 ແຫ່ງຂອງໂຮງໝໍລັດ.ຜ່ານການຮ່ວມມື ແລະ ຄວາມຕັ້ງໃຈທີ່ພວກເຮົາມີຮ່ວມກັນ ກໍເພື່ອໃຫ້ຜູ້ຕິດເຊື້ອທຸກຄົນໄດ້ເຂົ້າເຖິງການບໍລິການໃຫ້ຄຳປຶກສາ ໄດ້ເຂົ້າເຖິງຢາ ລວມເຖິງອາຫານທີ່ຈຳເປັນ ແລະ ຮັບປະກັນວ່າພວກເຂົາຈະບໍ່ຖືກຖີ້ມ ຫຼື ເສຍຊີວິດກ່ອນໄວອັນຄວນ.
ນອກຈາກນັ້ນ, ພວກເຮົາຍັງສຸ່ມໃສ່ຊ່ວຍເຫຼືອຜູ້ຕິດເຊື້ອເດັກນ້ອຍຊາຍ ແລະ ເດັກນ້ອຍຍິງທີ່ກຳພ້າພໍ່ແມ່ ໃຫ້ໄດ້ຮັບການສຶກສາຂັ້ນພື້ນຖານ ອຸປະກອນທີ່ຈຳເປັນ ແລະ ໂພຊະນາການທີ່ຖືກຕ້ອງເພື່ອໃຫ້ເຂົາມີສຸຂະພາບດີ ສາມາດຈະເລີນເຕີບໂຕຕາມໄວ. ແນ່ນອນ ມັນເປັນເລື່ອງຍາກ ຈຳເປັນຕ້ອງໃຊ້ເວລາ ແລະ ອາໃສການສະໜັບສະໜູນຈາກຫຼາຍພາກສ່ວນຢ່າງຕໍ່ເນື່ອງ.
ໂດຍທົ່ວໄປແລ້ວ, ບໍ່ວ່າຈະຢູ່ທີ່ໃດ ມັນຄົງບໍ່ແມ່ນເລື່ອງຫນ້າຍິນດີ ຖ້າເຮົາຮູ້ ຫຼື ເຫັນສະມາຊິກໃນບ້ານຄົນໜຶ່ງລົ້ມປ່ວຍ ແຕ່ເຮົາກັບກິນຢູ່ສະບາຍ ເຮົາມີຫຼາຍເຫຼືອລົ້ນ ອີກຄົນຂາດແຄນຈົນອະນາຖາ ຫຼື ເຮົາມີສຸຂະພາບດີແຂງແຮງ ອີກຄົນແຫ້ງແລ້ງຈົນລົ້ມປ່ວຍ ຄວາມອະຍຸດຕິທຳ ແລະ ເຫລື້ມລ້ຳໃນສັງຄົມມີມາຢ່າງຍາວນານ ແລະ ຈະບໍ່ມີວັນສິ້ນສຸດແນ່ນອນ.
ແນວໃດກໍຕາມ,ຂ້າພະເຈົ້າດີໃຈແລ້ວທີ່ໄດ້ເປັນສ່ວນໜຶ່ງຊ່ວຍເຫຼືອ ສະໜັບສະໜູນໃຫ້ສັງຄົມມີຄວາມເທົ່າທຽມ ແລະ ຫຼຸດຜ່ອນການຈຳແນກລັງກຽດຫຼາຍຂຶ້ນ ໂດຍສະເພາະ ການໄດ້ຊ່ວຍເຫຼືອເດັກອະນາຖາ ໃຫ້ການສະໜັບສະໜູນເຂົາ ໄດ້ເຂົ້າເຖິງການບໍລິການດ້ານສຸຂະພາບ ແລະ ມີຄຸນະພາບຊິວີດດີຂື້ນ ມັນເປັນຄວາມສຸກຢ່າງໜຶ່ງທີ່ເຮົາໄດ້ຊ່ວຍເຫຼືອ. ຫວັງວ່າໃນອະນາຄົດອັນໄກ້ ຊຸມຊົນທຸກບ່ອນຈະມີສຸຂະພາບກາຍ ແລະ ຈິດໃຈແຂງແຮງຮອບດ້ານ. ຂອບໃຈທຸກພາກສ່ວນ ແລະ ຜູ້ສະໜັບສະໜູນສະເໝີມາ.#aplpluslaos
