ທ້າວແກ້ວມາຈາກຊຸມຊົນທີ່ເປັນຊົນເຜົ່ານ້ອຍໆໃນເຂດພູດອຍໃນເມືອງຫຼວງນ້ຳທາ ແຂວງຫຼວງນ້ຳທາ ເຊິ່ງເປັນແຂວງໜຶ່ງຢູ່ທາງພາກເໜືອຂອງ ສປປ.ລາວ. ຕອນນັ້ນ ລາວຍັງນ້ອຍເກີນໄປ ທີ່ຈະຈື່ພໍ່ກັບແມ່ຕົນເອງ ແລະ ຮຽນຮູ້ເລື່ອງຕ່າງໆກັບພວກເຂົາ.ກ່ອນທີ່ພໍ່ແມ່ຂອງລາວຈະແຕ່ງດອງກັນ ແມ່ຂອງທ້າວແກ້ວ ເຊິ່ງເປັນຜູ້ຍິງຫນຸ່ມຄົນໜຶ່ງທີ່ບໍ່ຮູ້ອ່ານ ບໍ່ຮູ້ຂຽນຫນັງສື ບາງຄັ້ງບາງຄາວລາວໄດ້ເຂົ້າໄປເຮັດວຽກຢູ່ຮ້ານອາຫານຢູ່ໃນເມືອງ ກ່ອນທີ່ຈະກັບມາຕັ້ງຫຼັກປັກຖານໃນບ້ານເກີດ. ພໍ່ແມ່ຂອງລາວຕັ້ງຫນ້າລໍຄອຍທີ່ຈະມີຄອບຄົວທີ່ດີ ແລະ ເມື່ອທ້າວແກ້ວເກີດມາພວກເຂົາມີຄວາມສຸກຫຼາຍ ພວກເຂົາເອີ້ນຊື່ລູກວ່າ “ແກ້ວ” ເຊິ່ງໝາຍເຖິງ ອັນຍະມະນີທີ່ມີຄ່າທີ່ສຸດ.

ແຕ່ຈັ່ງແມ່ນໂຊກຮ້າຍ ຄວາມສຸກຂອງພວກເຂົາມີຢູ່ບໍ່ດົນ ສອງສາມປີຕໍ່ມາ ສຸຂະພາບຂອງຜູ້ເປັນແມ່ຊຸດໂຊມລົງ ແລະ ເສຍຊີວິດເພາະພະຍາດເອດ ຕອນທ້າວແກ້ວອາຍຸໄດ້ພຽງ 5 ປີ ຕໍ່ມາພໍ່ຂອງລາວກໍເສຍຊີວິດລົງຍ້ອນພະຍາດເອດເຊັ່ນກັນ.

ແມ່ຕູ້ຂອງທ້າວແກ້ວໄດ້ດູແລເດັກນ້ອຍກຳພ້າຕິດເຊື້ອຜູ້ນີ້ຕໍ່ ເປັນເວລາຫຼາຍກວ່າ 10 ປີແລ້ວ. ແມ່ຕູ້ຂອງທ້າວແກ້ວບໍ່ໄດ້ຮັ່ງມີຫຍັງ ລາວດຳເນີນຊີວິດ້ວຍຄວາມຍຸ້ງຍາກ ແລະ ຫາຢູ່ຫາກິນດ້ວຍການເຮັດສວນ.ລາວຮັກຫຼານຊາຍຫຼາຍ ແລະ ພະຍາມຢ່າງດີທີ່ສຸດໃຫ້ຫຼານໄດ້ຮຽນຫນັງສື ທ້າວແກ້ວຢາກເປັນຊ່າງແປງລົດ. ກ່ອນທີ່ແມ່ຕູ້ຂອງລາວຈະເສຍຊີວິດ ດ້ວຍຄວາມເປັນຫ່ວງ ລາວໄດ້ເວົ້າກັບ ຫົວຫນ້າກຸ່ມຊ່ວຍເຫຼືອຕົນເອງປະຈຳແຂວງ ວ່າ. “ ຂ້ອຍຍັງບໍ່ຢາກຕາຍ ເພາະຂ້ອຍຍັງມີພາລະ ທ້າວແກ້ວຍັງນ້ອຍ ຂ້ອຍຢາກໃຫ້ລາວໄດ້ເຂົ້າໂຮງຮຽນ ແລະ ມີລາຍຮັບສາມາດລ້ຽງຕົວເອງໄດ້ ແມ່ຂອງທ້າວແກ້ວມັນບໍ່ມີໂອກາດໄດ້ຮຽນຫນັງສື.”

ຫນ້າເສົ້າຫຼາຍ ແມ່ຕູ້ ເສຍຊີວິດລົງເມື່ອທ້າວແກ້ວອາຍຸ 16 ປີ ທ້າວແກ້ວຈຶ່ງໄປອາໃສຢູ່ກັບພີ່ນ້ອງ. ແນວໃດກໍດີ.ມັນບໍ່ແມ່ນເລື່ອງງ່າຍ ສຳຫຼັບພີ່ນ້ອງທີ່ຈະດູແລຄືລູກອີກຄົນຫນຶ່ງ ເພາະພວກເຂົາກໍເກືອບຈະບໍ່ສາມາດຫາລ້ຽງຄອບຄົວໄດ້ ໂອກາດທີ່ຈະຮຽນຈົບຊັ້ນມັດທະຍົມຕອນປາຍຂອງທ້າວແກ້ວຄ່ອນຂ້າງມືດມົວ ຈົນກວ່າ ລາວຈະໄດ້ຮັບການສະໜັບສະໜູນຫຼາຍກວ່ານີ້.

ຈາກນັ້ນ ສະມາຄົມເຄືອຂ່າຍຜູ້ຕິດເຊື້ອເຮສໄອວີ/ເອດ APL+ ໄດ້ຢືນມືເຂົ້າມາ ສະມາຄົມໄດ້ຊ່ວຍປັບປຸງຊີວິດຂອງເດັກນ້ອຍທີ່ມີຄວາມສ່ຽງຜ່ານໂຄງການກອງທຶນຂະນາດນ້ອຍສຳຫຼັບເດັກກຳພ້າທີ່ໄດ້ຮັບຜົນກະທົບຈາກພະຍາດເອດ ເຊິ່ງລວມເຖິງການໃຫ້ຄວາມສະໜັບສະໜູນທາງສັງຄົມນຳ.

ເພື່ອຊ່ວຍທ້າວແກ້ວ APL+ ໄດ້ຕັດສິນໃຈຕິດຕໍ່ທາງການສຶກສາ ເພື່ອຂໍທຶນຮອນໃຫ້ລາວເຂົ້າຮຽນຢູ່ໂຮງຮຽນກິນນອນຊົນເຜົ່າ. ໂຊກດີ ທີ່ຕອນນີ້ ທ້າວແກ້ວໄດ້ເຂົ້າຮຽນຢູ່ໂຮງຮຽນກິນນອນຊົນເຜົ່າ ໂຮງຮຽນເພີ່ນລ້ຽງອາຫານສອງຄາບຕໍ່ມື້ ມີຫ້ອງພັກ ແລະ ມີອຸປະກອນການສຶກສາຈຳນວນໜຶ່ງໃຫ້. APL+ ຊ່ວຍໃຫ້ທ້າວແກ້ວມີອາຫານເພີ່ມເຕີມ ຄື ອາຫານເຊົ້າ ເຄື່ອງແບບໂຮງຮຽນ ແລະຄ່າໃຊ້ຈ່າຍອື່ນໆ.

ເພາະການຊ່ວຍເຫຼືອຈາກ APL + ແລະ ທຶນການສຶກສາທີ່ລາວໄດ້ຮັບ ທ້າວແກ້ວຈຶ່ງຈະມີໂອກາດສຳເລັດການສຶກສາຊັ້ນມັດທະຍົມສຶກສາຕອນຕົ້ນ ສົກປີ 2022-2023ໄດ້. ທ້າວແກ້ວກ່າວວ່າ “ຂ້ອຍຢາກເຂົ້າໂຮງຮຽນວິຊາຊີບຫຼັງຈາກຈົບມັດທະຍົມຕອນຕົ້ນ ເວລາວ່າງຂ້ອຍມັກເຮັດສວນປູກຜັກ ແຕ່ອະນາດຄົດດຂ້ອຍຝັນຢາກເປັນຊ່າງແປງລົດ” ລາວອາດຈະພໍໃຈທີ່ສາມາດຮຽນຈົບ ມໍ 4 ໄດ້. ແຕ່ອະນາຄົດບໍ່ມີຫຍັງແນ່ນອນສຳຫຼັບທ້າວແກ້ວເລີຍ. ເນື່ອງຈາກລາວຈຳເປັນຕ້ອງມີທຶນ ຕ້ອງມີຄົນຊ່ວຍຄ່າຮຽນຕໍ່. ປັດຈຸບັນນີ້ APL+ ບໍ່ໄດ້ມີທືຶນຊ່ວຍລາວຈົນເຂົ້າໂຮງຮຽນວິຊາຊີບໄດ້.

ດັ່ງນັ້ນແລ້ວ. ຫຼັງຈາກສຳເລັດມັດທະຍົມຕອນຕົ້ນແລ້ວ ທ້າວແກ້ວອາດຈະຕ້ອງກັບບ້ານ ແລ້ວຊອກວຽກເຮັດເພື່ອດຳລົງຊີວິດ ລາວອາດຈະຕ້ອງປ່ອຍຄວາມຝັນນີ້ໄປ ເພາະບໍ່ມີຄວາມຮູ້ ຫຼື ບໍ່ໄດ້ຮຽນ ເໝືອນກັບວ່າຊີວິດຂອງລາວຈະລົງເອີຍດ້ວຍການເຮັດວຽກເປັນກຳມະກອນຢູ່ໃສບາງແຫ່ງໃນສວນຢາງພາລາຄືກັບໝູ່ຂອງລາວຫຼາຍຄົນ.

——–