ສາວເລົ່າວ່າ ສ່ວນຕົວມີຄວາມວິຕົກ ກັງວົນ ແລະ ຢ້ານກົວພະຍາດເອດສ໌ມາຕະຫຼອດ ບໍ່ຮູ້ຈະໄປປຶກສາໃຜ ແລ້ວມື້ໜຶ່ງຈຶ່່ງໄດ້ຮູ້ວ່າ ມີສະມາຄົມເຄືອຂ່າຍຜູ້ຕິດເຊື້ອເຮສໄອວີ/ເອດສ໌ ທີ່ໃຫ້ຄວາມຊ່ວຍເຫຼືອ ດູແລຜູ້ຕິດເຊື້ອຢູ່.
ຕົວເອງເປັນສາວ ເປັນນາງ ທຳມະດາຄົນໜຶ່ງ ທີ່ເຮັດວຽກ ກໍພໍມີຄົນຮູ້ຈັກ ແລະ ຫຼິ້ນກິນຕາມສັງຄົມ ມີທັງແຟນເກົ່າ ແລະ ແຟນໃຫມ່ ເປັນຕຳຫຼວດ ເປັນທະຫານກໍມີ.
ຄັ້ງໜຶ່ງ ໄດ້ໄປບໍລິຈາກເລືອດ ແຕ່ທ່ານໝໍບອກວ່າເລືອດບໍ່ຜ່ານ ຫມໍກໍບໍ່ໄດ້ໃຫ້ລາຍລະອຽດວ່າເປັນຫຍັງຈຶ່ງບໍ່ຜ່ານ.
ເພີນແນະນຳໃຫ້ກັບໃສກວດໃຫມ່ ເຂົ້າໄປກວດຢູ່ໂຮງໝໍແຫ່ງໜຶ່ງໃນນະຄອນຫຼວງວຽງຈັນ ໝໍສົ່ງໃຫ້ໄປຫ້ອງວິເຄາະ ຜົນອອກມາເພີນວ່າ ບໍ່ແນໃຈ ອີກ 3 ເດືອນໃຫ້ມາໃຫມ່ ຄົບ 3 ເດືອນແລ້ວກັບໄປອີກ. ບາດນີ້ພໍເຂົ້າໄປໂຮງໝໍໃດ ເຫັນໝູ່ ອາຍໝູ່ກໍໜີກັບມາອີກ ຈະໄປໂຮງໝໍໃດພັດວ່າ ມີພີ່ນ້ອງ ມີໝູ່ປະຈຳຢູ່ ສະຫຼຸບ ຍັງບໍ່ໄດ້ກວດ ເພາະຢ້ານ ແລະ ກົງວົນວ່າ ທົນທຸກໄດ້ປີກວ່າ
ປີຕໍ່ມາ ໄດ້ຮັບທຶນ ໄປສຶກສາຕໍ່ຕ່າງປະເທດກໍຕ້ອງຍົກເລິກ ເພາະຕ້ອງໄດ້ກວດສຸຂະພາບ.ຕອນນັ້ນ ຄື ເລີ່ມຈ່ອຍ ນ້ຳໜັກຫຼຸດ ຄິດຫຼາຍ ນອນບໍ່ຫຼັບ ກິນຢານອນຫລັບ ຈົນປະສາດລອນກໍ່ມີ
ຕໍ່ມາ ໄກ້ຈະອອກພັນສາ ແຟນບອກວ່າຊິມາຂໍ ກ່ອນແຕ່ງງານ ຕ້ອງໄດ້ກວດເລືອດ ຈິ່ງຕັດສິນໃຈເຂົ້າມາປຶກສາກັບສະມາຄົມເຄືອຂ່າຍຜູ້ຕິດເຊື້ອເຮສໄອວີເອດສ໌
ທາງສະມາຄົມກໍໄດ້ໃຫ້ຄຳປຶກສາ ແລະ ຕິດຕໍ່ຫາອາສາສະມັກທາງໂຮງໝໍໃຫ້ ແລະ ນ້ອງກໍໄດ້ຕັດສິນໃຈໄປກວດເລືອດຕາມຄຳແນະນຳຂອງສະມາຄົມ ພາຍຫຼັງໄປກວດ ລໍຖ້າຜົນປະມານ 15 ນາທີ່ ຜົນອອກມາປະກົດວ່າ ເປັນລົບ ບໍ່ມີເຊື້ອ.
ສາວຮູ້ສຶກຂອບໃຈທາງສະມາຄົມ ທີ່ອາສາຊ່ວຍໃນຄັ້ງນີ້ ສຸດທ້າຍກໍໄດ້ຮູ້ວ່າ ພະຍາດເຮສໄອວີ/ເອດສ໌ ເປັນພະຍາດໜຶ່ງທີ່ຫຼາຍໆຄົນຍັງຢ້ານກົວ ແລະ ຈຳແນກລັງກຽດເກີນໄປ ຄວາມຈິງແລ້ວ ພະຍາດເອດສ໌ ບໍ່ໄດ້ເປັນຕາຢ້ານ ແລະ ຕິດຕໍ່ກັນໄດ້ງ່າຍດາຍ ດັ່ງທີ່ຄິດ ຂໍພຽງເຮົາໃຊ້ຊີວິດບໍ່ປະມາດ ແລະ ຮູ້ຈັກການປ້ອງກັນ.
ການປ້ອງກັນທີ່ດີ ເລີ່ມຈາກການຮຽນຮູ້ ແລະ ເຂົ້າໃຈ ດັ່ງນັ້ນ ຜູ້ອ່ານຄວນເລີ່ມຕົ້ນດ້ວຍການກົດໄລຄ໌ ແລະ ກົດຕິດຕາມ HIV/AIDSlaos ເພື່ອຈະບໍ່ພາດ ສາລະ ຄວາມຮູ້ ເລື່ອງ ພະຍາດເອດສ໌ ແລະ ພະຍາດຕິດຕໍ່ທາງເພດສຳພັນ.
